भारतीय राजदूतावासद्वारा छात्रवृत्तिका लागि आवेदन माग

तेज डुम्रेल
दिपायल
काठमाडौंस्थित भारतीय राजदूतावासले महात्मा गान्धी छात्रवृत्ति योजना (MGSS) तथा स्वर्ण जयन्ती छात्रवृत्ति योजना (GJSS)अन्तर्गत २०२५–२६ शैक्षिक वर्षका लागि नेपाली विद्यार्थीहरूबाट आवेदन आह्वान गरेको छ ।
राजदूतावासका अनुसार इच्छुक विद्यार्थीहरूले २०२५ अक्टोबर ६ देखि नोभेम्बर २ सम्म अनलाइन आवेदन फारम भर्न सक्नेछन् । आवेदन फारम www.goischolarship.com.np वेभ पोर्टलमार्फत बुझाउन सकिनेछ । उक्त पोर्टल नोभेम्बर ३, २०२५ राति १२ः०० बजे बन्द हुने जनाइएको छ ।
महात्मा गान्धी छात्रवृत्ति योजना (कक्षा ११ का लागि)
यस छात्रवृत्तिका लागि नेपालका कुनै पनि मान्यता प्राप्त शैक्षिक संस्थामा कक्षा ११ (डिप्लोमा तहसमेत) मा अध्ययनरत विद्यार्थी योग्य हुनेछन् । विद्यालयका प्रधानाध्यापक वा प्रमुखको प्रमाणपत्र सहित आवेदन दिनुपर्नेछ ।
आवेदकले कक्षा १० मा कम्तीमा ६० प्रतिशत अंक हासिल गरेको हुनुपर्नेछ ।
स्वर्ण जयन्ती छात्रवृत्ति योजना (स्नातक तहका लागि)
स्वर्ण जयन्ती छात्रवृत्तिका लागि नेपालका मान्यता प्राप्त शैक्षिक संस्थामा स्नातक तहको पहिलो वर्षमा अध्ययनरत विद्यार्थी योग्य हुनेछन् । प्रधानाध्यापक वा शैक्षिक संस्थाका प्रमुखले प्रमाणित गरेको छात्र प्रमाणपत्र पेश गर्नुपर्नेछ । साथै, अन्य कुनै छात्रवृत्ति नलिएको प्रमाण पनि आवश्यक हुनेछ ।
अनलाइन आवेदन फारम बुझाउने अन्तिम मिति २०२५ नोभेम्बर २, राति ११ः५९ बजे तोकिएको छ । राजदूतावासले तोकिएको समयसीमाभित्र आवेदन फारम पूरा गरी पेश गर्न सबै विद्यार्थीहरूलाई अनुरोध गरेको छ ।